01.01.2022 dan Kuchga kiruvchi Qonunlar - O'zbekistonda

Xbox avatar   
Xbox
Naqd pulda uyga yetkazib beriladigan pensiya, istalgan hududdan ID-karta olish, hokim yordamchilari ishi boshlanishi, IELTS uchun oylikka 20 foiz ustama va boshqa o‘zgarishlar.

Kun.uz sayti o‘z an’anasiga muvofiq 2022 yil 1 yanvardan O‘zbekiston qonunchiligida kuchga kiradigan ayrim o‘zgarishlarni eslatib o‘tadi.

ID-karta hamda xorijga chiqish biometrik pasportini rasmiylashtirish va berish davlat xizmatlari markazlari orqali ham amalga oshiriladi.

Respublikaning istalgan hududida ID-kartalarni olish va almashtirish imkoniyati yo‘lga qo‘yiladi.

Pensiya va nafaqalarni to‘lash tender asosida tanlangan tijorat banki tomonidan amalga oshiriladi. Bunda, bankka pensiya va nafaqalarni naqd pulda fuqarolarning yashash manzillariga yetkazib berish majburiyati yuklatiladi.

Chakana savdo, umumiy ovqatlanish va aholiga maishiy xizmat ko‘rsatish obektlarida qilingan xarid chekini soliq organlarining maxsus mobil ilovasida skanerlagan jismoniy shaxslarning kartalariga oy yakunida xarid summasining 1 foizi qaytariladi. Shuningdek, mijozga chek bermasdan mahsulot sotganlik yoki xizmatlar ko‘rsatganlik to‘g‘risida soliq organlariga maxsus dastur orqali xabar bergan jismoniy shaxslarga, huquqbuzardan undirilgan jarimaning 20 foizi miqdorida mukofot to‘lanadi.

Har bir mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchisi lavozimi ta’sis etiladi.

Davlat tashkilotlari tomonidan aholi va tadbirkorlik sub’yektlaridan bir qator ma’lumotnoma va hujjatlarni talab qilish tartibi bekor qilinadi.

Ayrim davlat xizmatlari uchun undiriladigan davlat bojlari, yig‘imlar va boshqa to‘lovlar miqdori kamaytiriladi.

Davlat xizmatchilari, ularning turmush o‘rtog‘i va voyaga yetmagan farzandlarining daromadlari va mol-mulkini majburiy deklaratsiya qilish tizimi joriy etiladi. Bundan tashqari, davlat xizmatchilariga respublika hududidan tashqarida hisobraqamlar ochish va egalik qilish, naqd pul mablag‘larini saqlash, ko‘chmas va boshqa mol-mulkka ega bo‘lish taqiqlanadi.

Yetim bolalar va ota-ona qaramog‘idan mahrum bo‘lgan bolalarni farzandlikka, vasiylikka olish «Vasiylik va homiylik» elektron platformasi orqali amalga oshiriladi.

Nogironligi bo‘lgan shaxslarni ishga qabul qilgan ish beruvchilarga (davlat tashkilotlari bundan mustasno) har bir xodim uchun 6 oy davomida har oyda BHMning 1,5 baravari (405 ming so‘m) miqdorida subsidiya beriladi.

Barcha tuman (shahar)larda budjet umumiy xarajatlarining 5 foizi jamoatchilik fikri asosida shakllantirilgan tadbirlarni moliyalashtirishga yo‘naltiriladi.

Xorijiy tillardan sertifikatga ega davlat boshqaruv idoralari xodimlariga lavozim maoshiga nisbatan 20 foizgacha qo‘shimcha ustama to‘lanadi.

Yuqori natija ko‘rsatilganda imtihon topshirish xarajati qoplab beriladigan xalqaro imtihon tizimlari ro‘yxati kengayadi.

Mo‘ynoq tumanidagi tadbirkorlik sub’yektlari uchun bir qator soliq stavkalari 1 foiz etib belgilanadi hamda kichik tadbirkorlik sub’yektlariga korxona qurilishi uchun zarur bo‘lgan asbob-uskuna va texnikalarni temir yo‘l transportida tashish xarajatlarining yarmi qoplab beriladi.

Tumanlarda (Toshkent shahri bundan mustasno) faoliyat yurituvchi YaTTlarga belgilangan ijtimoiy soliq stavkasi 2 baravarga pasaytiriladi.

Jismoniy va yuridik shaxslar tomonidan avtomototransport vositalarini elektron onlayn-auksion yo‘li bilan ijaraga berishda shartnomalarni notarial tasdiqlash talabi bekor qilinadi.

Kameral soliq tekshiruvi natijasida aniqlangan huquqbuzarliklar uchun va tadbirkorlik sub’yektlari tomonidan soliq hisobotini belgilangan muddatlarda taqdim etmaganlik uchun moliyaviy sanksiyalar bekor qilinadi.

Fuqarolarga korrupsiya haqida tezkor xabar berish imkonini beruvchi tun-u kun faoliyat yuritadigan «Call-markaz» ishga tushiriladi.

«Halollik vaksinasi» tamoyili asosida davlat xizmatchilarini korrupsiyaga qarshi kurashish, manfaatlar to‘qnashuvi va odob-axloq qoidalari bo‘yicha maxsus o‘quv kurslarda o‘qitish tizimi joriy etiladi.

Metropoliten yo‘nalishlari (ularning qurilishi bo‘yicha ma’lumotlar), bekatlar (ular atrofida joylashgan obektlar va jamoat transporti yo‘nalishlari), poyezdlar harakati jadvali, elektron to‘lov hamda boshqa ma’lumot va xizmatlarni o‘z ichiga oluvchi mobil ilova ishga tushiriladi.

Yo‘lovchi tashish yo‘nalishlarini ochiq tenderlar orqali tashuvchilarga biriktirish elektron axborot tizimi test rejimida ishga tushiriladi.

Pedagog xodimlarga malaka toifasini berishning yangi tizimi joriy qilinadi.

QQS to‘lovchilarga asosiy vositalar, nomoddiy aktivlar va tovar-moddiy resurslarni hisobga olish hamda o‘z ustav fondini shakllantirish va kamaytirish bilan bog‘liq barcha operatsiyalarni «E-aktiv» axborot tizimida aks ettirish majburiy hisoblanadi.

Hududiy ichki yo‘llarni ta’mirlash uchun ajratiladigan mablag‘larning 50 foizi «Ochiq budjet» portali orqali jamoatchilik fikri asosida aniqlangan ichki yo‘llarni ta’mirlashga yo‘naltiriladi.

Xonadonda pilla yetishtiruvchilarga hosilning bir kilogrammi uchun 5 ming so‘m miqdorida subsidiya ajratiladi hamda tutzorlarni sug‘orish uchun foydalanilgan suv hajmiga soliq stavkasi 50 foiz miqdorda qo‘llaniladi.

Sud qarorlari ish bo‘yicha taraflarga onlayn tarzda, ularning iltimosnomasi bo‘yicha esa qog‘oz shaklida taqdim etiladi, sudlar faoliyatida «Adolat» axborot tizimlari kompleksi joriy etiladi.

Geologiya-qidiruv va izlanish ishlari o‘tkazish uchun ajratilgan yer uchastkalari yuridik shaxslardan olinadigan yer solig‘i solish obekti hisoblanmaydi.

Ishlab chiqaruvchi korxonalar tomonidan sotiladigan suyultirilgan gazga aksiz solig‘i solinmaydi.

Telekommunikatsiya operatorlari va provayderlari Internet tarmog‘iga keng polosali ulanish tarmoqlarini loyihalash va qurishda:

  • ma’muriy binolar va ko‘p kvartirali uylarni kamida 1 Gbit/s o‘tkazuvchanlik qobiliyati bilan;
  • ta’lim tashkilotlari, sog‘liqni saqlash muassasalari va boshqa davlat tashkilotlarini kamida 100 Mbit/s o‘tkazuvchanlik qobiliyati bilan ulaydi.

Toshkent irrigatsiya universiteti o‘zini o‘zi moliyalashtirish tizimiga o‘tkaziladi.

«O‘zbekgidroenergo» AJ tarkibidagi GESlar tomonidan ishlab chiqariladigan elektr energiyasini sotib olish narxlari o‘zgaradi.

Mustaqil ekspertlarga normativ-huquqiy hujjatlar va ularning loyihalarini korrupsiyaga qarshi ilmiy va mustaqil ekspertizadan o‘tkazish huquqi beriladi.

Ombudsmanning mintaqaviy vakillari faoliyatini yo‘lga qo‘yish uchun qo‘shimcha 14ta shtat birligi ajratiladi.

O‘zbekiston Respublikasi bojxona chegarasi orqali olib chiqiladigan har bir kilogramm ip-kalava va trikotaj mato uchun 0,05 AQSh dollari miqdorida yig‘im undiriladi.

Ortiqcha undirilgan bojxona to‘lovlari tegishli qaror qabul qilingandan so‘ng 3 ish kuni davomida qaytariladi hamda bojxona to‘lovlarini bo‘lib-bo‘lib to‘lashning eng kam muddati 14 kun etib belgilanadi.

Mamlakat iqtisodiyoti uchun ustuvor ahamiyatga ega bo‘lgan, strategik sohalarga oid ayrim aksiyadorlik jamiyatlarini boshqarishda davlat ishtirokining maxsus huquqi (oltin aksiya) bekor qilinadi.

Uyali aloqa operatorlari uchun uyali aloqa xizmatlariga solinadigan aksiz solig‘i stavkasi 10 foiz etib belgilanadi.

Mol-mulk auksionda sotilgunga qadar uchinchi shaxslarning egaligiga o‘tib ketgan va bu holat auksion yakunlanganidan so‘ng aniqlansa, zakalat puli auksion g‘olibiga qaytarib beriladi.

Paxta va boshoqli don yetishtirishda sug‘orish inshootlari iste’mol qilgan elektrni davlat budjetidan qoplash tartibi faqat suv tejovchi texnologiyalarni joriy etgan sub’yektlarga tatbiq etiladi.

«Yevro-4» ekologik toifa talablariga mos kelmaydigan gaz, benzin va dizel dvigatellari bilan jihozlangan «M» va «N» toifalaridagi g‘ildirakli transport vositalarini hamda «Yevro-3»dan past ekologik toifadagi motor yoqilg‘isini vaqtincha olib kirish va import qilish man etiladi.

Respublikadagi barcha sement ishlab chiqarish korxonalarining atmosfera havosini ifloslantirish manbalarida namunalar olish va tahlil qilish bo‘yicha avtomatik stansiyalar, ularga tutash hududlarda statsionar kuzatish punktlari ushbu tashkilotlar mablag‘lari hisobiga o‘rnatiladi.

Tsement ishlab chiqarishga mo‘ljallangan 1 tonna ohaktosh uchun yer qa’ridan foydalanganlik solig‘i stavkasi ikki baravar kamaytiriladi.

Qo‘shilgan qiymat solig‘ining salbiy summasini qoplash (qaytarish) uchun soliq organlariga ariza bilan alohida murojaat qilish haqidagi majburiy talab bekor qilinadi.

Umumiy ovqatlanish korxonalariga soliq organlarini xabardor qilgan holda bir qator soliq va yig‘imlar bo‘yicha qarzdorlikni 2022 yil 1 iyulga qadar bo‘lib-bo‘lib to‘lash huquqi beriladi.

Tadbirkorlik sub’yektlariga umumiy maydoni 1 ming kvadrat metrdan ortiq bo‘lgan yer uchastkalariga va (yoki) bino va inshootlarga nisbatan mulk huquqini qo‘lga kiritganda mol-mulk solig‘i va yer solig‘i bo‘yicha hisoblangan soliqlarni to‘lashni 6 oy muddatga kechiktirish huquqi beriladi.

Toshkentning Bektemir va Uchtepa tumanlarida obodonlashtirish va ko‘kalamzorlashtirish vazifalarini autsorsing asosida tadbirkorlarga berish yuzasidan huquqiy eksperiment o‘tkaziladi.

Tabiiy monopoliya sub’yektlari, bozorda ustun mavqega ega bo‘lgan sub’yektlarda monopoliyaga qarshi komplayens tizimi joriy etiladi.

O‘rmon fondining foydalanilmayotgan yerlarini jismoniy va yuridik shaxslarga ijaraga berish onlayn-auksion orqali amalga oshiriladi.

Tibbiyot tashkilotlarini ixtiyoriy akkreditatsiyadan o‘tkazish mexanizmi joriy etiladi.


No se encontraron comentarios